सांग ना रे देवा

शोधू कुठे मी तुजला 

तूच सांग ना रे देवा ।

मनात आहे रे भाव 

हा तुझाच आहे ठेवा ।

हात दोन्ही मी जोडून

करतो रे तुझी भक्ती ।

उपसतो कष्ट  सारे

आहे तुझीच रे शक्ती ।

दोन वेळ पोटभर

मिळते मज भाकरी ।

जातो थकून भागून

निजतो नाही साथरी ।

भाव तुझा या मनात

नाम तुझे सदा मुखी ।

नाही मागणार काही

ठेवतो तू मज सुखी ।

होऊ दे कल्याण सारे

तुझ्या चरणी दे जागा ।

दुःख देते आठवण

तो तुझ्या माझ्यात धागा ।

भेट हवी मज आता

करीन तुझी मी वारी ।

सदा ठेव मज असा

येईल मी तुझ्या द्वारी ।

संजय रोंघे

नागपूर