क्षण कुठला कसा
नाही कुणास ठाव ।
जगतो प्रत्येक क्षण
मनात मात्र हाव ।
चाले आयुष्यभरच मग
नुसती धावाधाव ।
पैसा पैसा करत जगतो
कशाला हवे मोठे नाव ।
निघून जाते वेळ कशी
मग उरते काय राव ।
विचार थोडा करुनिया
वेळ सत्कारणी तू लाव ।
लाभेल तुज थोडी शांती
करू नकोस रे घाव ।
ऐश्वर्याचा होशील धनी
कळेल तुलाच प्रभाव ।
Sanjay R.
लागला ध्यास तुझा
मनात दर्शनाची आस ।
जळी स्थळी पातळी
होतात तुझेच रे भास ।
टाकतो पाऊल पुढे
निरंतर चाले हा प्रवास ।
घालवू कसे आठवणींना
थांबेल तुझ्याविना श्वास ।
असावा सदा तू सोबत
चाले तेची सारे प्रयास ।
ये बा विठ्ठला तू आता
हवा तूच रे आम्हास ।
उघड दार मंदिराचे
अंत नको रे तू पाहुस ।
सांगतो तुला मनातले
जीव गुंतला तुझ्यात ।
Sanjay R.
बघा चीनने केला कसा हो घात
घाबरली दुनिया बसली घरात ।
सगळीकडे पसरला कोरोना
ओरड दुनियेची एक सुरात ।
पद्धती जीवनाचीच बदलली
पाळतात दुरावा साऱ्या जगात ।
बाहेर निघताना घालायचा मास्क
ओळख साऱ्यांची दिसत नाही दात ।
ऑफिस झाले बंद शाळा ही बंद
जगच सारे थांबले एका क्षणात ।
हळूहळू आता होतंय सारं सुरू
तरीही आहे भीती किती मनात ।
सारेच संशोधक जोमाने भिडले
लवकरच येईल लस म्हणतात ।
सम्पव बाप्पा देवा आता हे सारे
हसू दे साऱ्यांना थांबलेल्या जगात ।
Sanjay R.
