प्रेमाचा हल्ला

अंतरी भावनांचा कल्ला

ह्रदयात प्रेमाचा हल्ला ।

वाट ही तू चालू नकोस

मनाचा अनमोल सल्ला ।

डोक्यात विचारांचे थैमान

क्षणो क्षणी हरपते भान ।

दूर दूर तू राहू नकोस

आठवण येता लागते ध्यान ।

होकार नकार दूर अजून

नजरेनेच तर टिपले बाण ।

करू करू मी काय करू

सांगा कुणी हो मी अजाण ।

Sanjay R.

निशा

कुठली पूर्व कुठली पश्चिम

सूर्यच ठरवितो आपली दिशा ।

तापून निघतो दिवसभर जेव्हा

निजवते घेऊन कुशीत निशा ।

Sanjay R.

टी व्ही बंद पडला

आमचा टी व्ही बंद पडला

बातम्याच हो दिसत नाही ।

पिक्चर मालिका सारेच बंद

म्हणून कोणीच हसत नाही ।

सगळ्यांचा डोक्यावर हात

विचारही येतात काही बाही ।

सारेच बसलेत चिडी चूप

कोणीच कोणाशी बोलत नाही ।

मन झाले उदास किती

भूकही आताशा लागत नाही ।

वाट बघतोय डायनिंग टेबल

तासन् तास कोणी जेवत नाही ।

मेकॅनिक म्हणतो विकून टाका

नवीन शिवाय उपाय नाही ।

खिसा थोडा खालीच आहे

महागाईत तोही भरत नाही ।

लाडकी बहिण लाडका भाऊ

त्यांच्याशी पण जमत नाही ।

काय करू सांगा हो जरा

घरात कोणीच हसत नाही  ।

Sanjay R.

अश्रू कोण ढाळतं

ओढ जर असेल तर

कोण कशास टाळतं ।

नसेल काहीच तर

अश्रूही कोण ढाळतं ।

प्रेम असेल मनात तर

विरहातही मन जळतं ।

राग जर क्षणाचा तर

नियमच कोण पाळतं ।

भाव मनात असेल तर

सारं मनालाही कळतं ।

दुःख मनात नसेल तर

आतच तेही हळहळतं ।

Sanjay R.

पाचोळा

तुमच्या सारखं मला

बिलकुल जमत नाही ।

वाटतं एकटाच पडलो

कसं ते गमत ही नाही ।

झाले आकाश निरभ्र

ढगांचा पत्त्ता नाही ।

भिजलो खूप पावसात

मनात ओलावाच नाही ।

पालवी सुकून गेली

उरले पानही नाही ।

गुलाब मोगरा कुठला

फुलला झेंडूही नाही ।

रुक्ष नीरस झाले सारे

पाचोळा दिसत नाही ।

लोपले हसू आता, पण

डोळ्यात अश्रू नाही ।

Sanjay R.