हवा कुणास आधार

हवा कुणास आधार
डोक्यावर होतो भार ।
पदोपदी मी झेलतो
मनात सारे प्रहार ।

असह्यच होते सारे
देतात घाव ते वार ।
थांबतात कुठे डोळे
आपोआप लागे धार ।

मुक्त व्हायचे मजला
नको वाटती विचार ।
भूत झालेत ते जुने
नवा शोधतो मी सार ।
Sanjay R.

शोधू मी कुठे तुला

शोधू मी कुठे तुला
तूच तर माझी आस ।
नजरही असते शोधत
नजरेलाच होतात भास ।

गंध तुझा दरवळतो
धुंद होतात श्वास ।
मनही मग घेते धाव
त्यालाही तुझाच ध्यास ।

तू मात्र सदा बेखबर
कळेना तुज माझे प्रयास ।
बघ जरा वळून मागे
अजूनही माझा तिथेच वास ।
Sanjay R

आहे देव या मनात

जिथे भाव तिथे देव
मनातली आहे ठेव ।

संकटात येता याद
विश्वासास मिळे साद ।

करायची थोडी भक्ती
जाणायची त्याची शक्ती ।

नाही कशाचीच आशा
करी दूर तो निराशा ।

करू देवाचाच ध्यास ।
निरंतर घेऊ श्वास ।

आहे देव या मनात
शोधा त्यासी माणसात ।
Sanjay R.

नको ते विचार

नको ते विचार
डोक्यात येतात ।
अस्वस्थ करून
मग दूर जातात ।

सुचत नाही काही
विचारही थांबतात ।
नजर जाते शून्यात
श्वास मंद होतात ।

नको नको ते विचार
हवा थोडा आनंद ।
विसरून सारे बघा
होऊ चला धुंद ।
Sanjay R.

आठवण

तुझ्या आणि माझ्यात
ऐक वेगळाच बंध ।
तू तिथे आणि मी इथे
तरीही दरवळतो सुगंध ।

हसतेस ना तू जेव्हा
मन माझेही हसते ।
आठवतो चेहरा तुझा
शोधतो कशी तू दिसते ।

विसरेल मी कसा
जुन्या त्या आठवणी ।
कधी व्हायची हळवी
नी डोळ्यात पाणी ।

आज सहजच मज
का याद तुझी आली ।
मीही झालो हळवा
का सोडून तू गेली ।
Sanjay R.