" नकळत घडले सारे "

नकळत घडले सारे

अचानक आले वारे ।

कोसळले का आकाश

गेलीत वाहून घरे ।

ना उरला माणूस

ना उरले गुरे ढोरे ।

होत्याचे झाले नव्हते

कोपला का असा रे ।

सांगू कुणास आता

मन मनास विचारे ।

Sanjay R.

" असा कसा रे तू पावसा "

असा कसा रे तू पावसा

नेमका वेळेवर तू आलास ।

भर रस्त्यात मला रे

चिंब भजवून तू गेलास ।

वाट बघतात तुझी जिथे

तिथून तू निघून आलास ।

भिजव थोडी शेती बागा

तिथेच करतो कशाला मिजास ।

गरीब बिचारा तो शेतकरी

अश्रूही नाही त्याच्या डोळ्यास ।

जास्त कधी कमी कधी

नाही उतरत तू भरवश्यास ।

पड जरा जाऊन तिकडे

दाखवू नकोस नुसते आभास ।

तुझ्याविना जीवन व्यर्थ

करतात सारेच तुझा ध्यास ।

Sanjay R.

" नाचे मोर मनात "

नाचे मोर मनात

हर्ष उठे तनात ।

उल्हास होई जागा

आनंद गगनात ।

सोडून दुःख आता

हसायचे क्षणात ।

सुख दुःख येतीजाती

हवे काय जीवनात ।

Sanjay R.

" काय बोलायचं "

बोलायला नको विषय

हवे नको ते बोलायचे ।

गुपित मनातले सारेच

उघड करून सोडायचे ।

वाणी तारी वाणीच मारी

नाही कुणाला कशाचे ।

शब्दच करी कधी अनर्थ

मात्र मग चूप बसायचे ।

Sanjay R.

" ज्योत जळते दारात "

उठले वादळ मनात

विखुरले स्वप्न क्षणात ।

आता शोधू कुठे विसावा

झालो परका का जनात ।

वाहतो एकटाच मी ओझे

नाही उरले त्राण उरात ।

वाटही दूर किती अजून

वाटे वहात चाललो पुरात ।

मंद मंद झालेत श्वास

प्राण कंठाशी आले सुरात ।

उलटून देह हा पडला

आता ज्योत जळते दारात ।

Sanjay R.