" तूच माझी प्रीत "

कळतंय मला तुझं गं
माझ्यावरचं हे रुसणं ।
डोळ्यात माझ्या बघत
गालातल्या गालात हसणं ।

मलाही वाटत थोडं
असच तू थोडं रुसावं ।
हसताना गालावर तुझ्या
त्या गोड खळीला बघावं ।

आकाशातून सरसर येणाऱ्या
पावसात थोडं भिजावं ।
गरम गरम चहा आल्याचा
पीत हितगुज थोडं करावं ।

रंगलेल्या त्या गप्पांमध्ये
प्रीती ला थोडं फुलवावं ।
घेऊन तुझा हात हातात
मनाला हळुवार झुलवावं ।

प्रीत माझी ग तूच प्रिये
तुझ्या विना नाही रंग ।
सोडू नकोस कधीच मला
हवा मला तुझाच संग ।
Sanjay R.

" सरसर सरी "

सरसर सरसर
कोसळतात सरी ।
रात्र नशिली आणि
सोबतीला तुं गं परी ।

झाले धुंद तनमन
वाटे घ्यावे धुंद भिजून ।
अलगद टिपून घ्यावे
थेंब ओठावरचे अजून ।

हात घेऊन हातात
कवेत तुजला घ्यावे ।
वाटे रेशमी स्पर्शात
एकरूप तुझ्यात व्हावे ।
Sanjay R.

" पाच ऑगस्ट 2019 नवा इतिहास "

अखंड माझा हा भारत
काश्मीर ते कन्याकुमारी ।
फडकला तिरंगा आता
उत्साह फुलला दिशा चारी ।

स्वप्न गेलेत तुटून त्यांचे
नवाबी थाटात जगणे ज्यांचे ।
आतंक दहशत वादच सम्पला
सांडवू रक्त आता घुसखोरांचे ।

सुजलाम सुफलाम देश आमचा
काश्मीर आमचे नंदनवन ।
हसेल बगडेल सारेच आता
लाल चौकात फुलवू वृन्दावन ।
Sanjay R.

" गारुडी "

मांडायचा जेव्हा गारुडी
नागोबाचा खेळ।
काळायचंच नाही मग
गेला किती वेळ ।

साप मुंगूस ची लढाई
आमिष तो दाखवायचा ।
उत्सुकता इतकी मनात
त्यातच तो भुलवायचा ।

फणा काढलेला नाग
पुंगी च्या नादावर डोलायचा ।
दाखवून भीती गारुडी
खिशातले पैसे काढायचा ।

दर्शन देऊन नागाचे
धोपटी आपली भरायचा ।
मुंगूस सापाची लढाई
मुद्दामच तो विसरायचा ।
Sanjay R.

" मित्र महान "

मैत्री म्हणजे विश्वास
नेहमीच मित्रांचा ध्यास ।
मैत्री जीवनाचा आधार
नाही वाटत कशाचाच भार ।
मैत्री म्हणजे आपलेपणा
अशक्य सारेच मित्रांविणा ।
मित्र म्हणजे मोठी हिम्मत
दूर झाल्यावर कळते किंमत ।
मित्र आयुष्यातले सुख
जाणवणार नाही दुःख ।
मित्र आठवणींचा भाग
आठवतात येताच जाग ।
मित्रांविना हलत नाही पान
मैत्री मित्रांची खरच महान ।
Sanjay R.