" मोगऱ्याची कळी "

बघून तुझ्या गालावर
गोड गुलाबी खळी ।

मनात माझ्या खुलली
जशी मोगऱ्याची कळी ।

सहजच मी गुणगुणलो
चार प्रेमगीताच्या ओळी ।

शब्दांना कुठले नव्हते बंध
तरी का ओठांना ते छळी ।
Sanjay R.

" लायब्ररी "

आवड होती वाचनाची
जायचो मी लायब्ररीत ।
वाचनापेक्षा मजा यायची
निरीक्षण तिथे करण्यात ।
निमित्तच असायचे वाचन
दिसायचं त्यांच्या वागण्यात ।
भाव डोळ्यातले त्यांचे
वेळ जायचा बघण्यात ।
वाटायचं मग मला  जणू
लायब्ररीच आहे कादंबरी ।
तरुण्यातल्या त्या प्रेमाची
लघुकथाही तीच खरी ।
Sanjay R.

" नको मनात अहंकार "

नको मनात अहंकार
वाईटच हा संस्कार
साधा सरळ आचार
नको वाईट विचार
हा आयुष्याचा आधार
करावे थोडे उपकार
वाटेल हलका भार
असता हाच सार
जीवनात तारे चार
Sanjay R.

" लेक पडावी सुखात "

विचार एकच लेक पडावी सुखात

राहील ना मी थोडासा दुःखात ।

समाजाची चिंता असे डोक्यात
असो वा नसो पैसा खिशात ।

करायचे लग्न ब्यांडच्या ठोक्यात
वस्ताद सासरचे दुषणं देण्यात ।

कमी नको पडायला काही कशात
उधळतो पैसा नी डुबतो कर्जात ।

इज्जत प्यारी दिसते डोळ्यात
असह्य झाले तर फास गळ्यात ।
Sanjay R.

" आमच्या गावचा शिरपा "

ओयखता का हो तुम्ही

आमच्या गावचा शिरपा ।

काय म्हनावं बा त्याले

एका डोळ्यानं तिरपा ।

करून मोल मजुरी 

थो कसा तरी जगते ।

पोरी त्याले सात पर

वाट पोराचीच पायते ।

लेकरायची न्हाई सोय

पोरगच पायजेन म्हनते ।

बायकोबी तशीच त्याची

तिले बी काय कयते ।

लेकरायचे हाल पाहून

मन साऱ्यायचं जयते ।

पर शिरपा न्हाई मानत

थो पोरकडच पयते ।

Sanjay R.